Når nøden er størst …

Kva gjer ein når sommaren kjem og huset blir fylt opp med heimflytta barn, venner og kjærestar …- og oppvaskemaskina seier takk for seg?

Jo, då går ein sjølvsagt på nattopent og får kjøpt seg ei ny, med levering snarere enn snott. Ganske dyr maskin faktisk, litt sveiseblinde av stemninga på nattopent.

Vidunderet skulle komme i hus mellom 09:00 og 16:00 på mandagen. Lang historie kort: den nye maskina blei levert klokka 22:45 om kvelden, og den gamle henta neste kveld etter nok ein runde med telefonering og venting …

Jaja, endeleg skulle vi få ny oppvaskmaskin! Heile huset gleda seg til sleppe oppvaskjobben som blir ganske omfattande med mange til bords. Så skjedde dette:

Skulle dytte maskina på plass innunder kjøkkendisken, og der kom forsyne meg avløpsslangen i klem og blei flat! Kverka sånn at slangen var deformert og det nesten var hol i. Skrekk og gru!  Og sjølvsagt skjedde dette etter stengetid. Ny runde med venting. Når vi kontakta butikken om ny slange, kunne vi sjølvsagt få det – blei henta samme dag, saman med ei skøytemuffe som kunne brukast hvis vi vurderte det som enklare å kutte og skjøyte enn å bytte heile slangen.

Så her sette vi i gang med friskt mot og håp om å få maskina i gang snarast (oppvaskhaugen blei etterkvart gedigen, sidan alle utsette å vaske opp når den nye maskina no i praksis var timar unna), og oppdaga følgande: å bytte denne avløpsslangen var mildt sagt ikkje enkelt! Slangen som kom ut bak, snodde seg opp og rundt og framover og slutta heilt framme innunder døra på maskina. Begynte å løsne litt bak på maskina, men oppdaga fort at det var faktisk akkurat like komplisert som det såg ut å få tak i den slangen – måtte faktisk demontere halve maskina. Rett og slett ikkje aktuelt på ei splitter ny maskin!

Så var det skøytemuffa, som såg nokså feil ut i forhold til slangen, både dimensjon og type, skulle vi tørre å kutte slangen og prøve? Ingen veg tilbake når ein først har kutta!

Då var det at vi kom på å spørre rørlegger Antonsen! Tok bilder av skaden og sprang til butikken, kan du vere så snill å hjelpe meg med å finne ut kva som er lurt å gjere??? Og der fekk vi hjelp!

Løysinga var å bruke hårføner på slangen til den blei mjuk nok til å bøye tilbake, også reparere/sikre med vulkaniseringsteip. «Og det tenker eg du får henne hos Faanessen, så slipper du løpe helt bort på Bystasjonen», sa rørleggeren.

Og ellers kunne han med ein gong fortelle at den skøytemuffa vi hadde fått, var heilt feil og ikkje lagd for denne typen stiv plastslange, ville aldri blitt tett.

Takk og pris! I denne situasjonen var dette som manna frå himmelen for oss, som hadde klart å øydelegge ei splitter ny oppvaskmaskin før den kom inn på plassen sin. Vi gjorde som han foreslo, og alt blei heilt perfekt bra.

Har tenkt lenge på korleis eg kunne få takka Antonsen for dette, og i løpet av ferien komme fram til at dette leserbrevet skal vere vår takk. Vi er så heldige som har ei så kompetent bedrift med så hyggelege folk så lett tilgjengelig på Nordnes! Det er faktisk den siste røyrleggaren som er igjen i sentrum. Så her gjeld det om, kjære Nordnesfolk – å bruke vår lokale rørleggar når vi har slike jobbar som skal utførast,- slik at han aldri kjem på tanken om å flytte på seg!

Helsing supertakknemleg Nordnesboer (med lite oppvask på disken :))