Sprøyterom er ikkje løysinga

Geir Indrefjord og Ove Sverre Bjørdal vil ikkje ha sprøyterom. Foto: Wikipedia/pressefoto.

Er ikkje hjelp eller behandling, meiner Senterpartiet.

Av Geir Indrefjord og Ove Sverre Bjørdal, Bergen Senterparti

Dei grøne, SV og Venstre i Bergen går langt i å saleggjere sprøyterom som løysinga for byens rusmisbrukarar. AP og Høgre er også for sprøyterom. Vi er usamde. Sprøyterom er gårsdagens løysing – og jamvel då gav ho dårlege resultat. I Oslo føregår no berre to prosent av narkotikainjeksjonane i sprøyterom, jamvel om det er tilgjengeleg sentralt i byen. I utlandet legg ein ned sprøyterom av di dei narkomane ikkje bruker dei. Det er også eit problem at tradisjonelle sprøyterom legg opp til at heroinavhengige framleis skal injisere stoffet – i staden for å røyke det, som er ein mykje tryggare administrasjonsform med mellom anna betydeleg lågare risiko for overdoser.

Først og fremst har vi likevel ei prinsipiell innvending mot sprøyterom. Sprøyterom er ikkje hjelp eller behandling, sprøyterom er å gje opp dei narkomane og gøyme dei bort. I staden for å bruke tid og ressursar på eit feilslått prosjekt som vil halde dei narkomane lenger i misbruket, meiner vi det bør satsast kraftig på å betre behandlingstilbodet – særleg for yngre misbrukarar. Målet må vere at det skal vere tilgjengeleg behandlingsplass for alle innan eit par veker – ikkje etter fleire år, som ofte er tilfellet i dag. Behandlingsopplegget må også i større grad leggje opp til å sjå heile mennesket. Narkomane er ikkje berre narkomane – dei har draumar og bebov for meining nett som deg og meg. Mange treng eit nytt sosialt nettverk og kan hende ny bustad. Nokon treng hjelp frå psykolog eller frå psykiatrien. Alle treng arbeid. Arbeid gjev meining med tilvera, og arbeid gjev ein struktur på dagen som kan hende særleg rusmisbrukarar og tidlegare rusmisbrukarar treng. Arbeid gjev òg sjølvverd og bidreg til inkludering i storsamfunnet. Då er det viktig at ein legg opp til eit behandlingstilbod der alle desse tinga er med. Ein kan ikkje halde fram som i dag, der mange vert sende rett på gata etter at dei verste abstinensane har gjeve seg.

Vi vil at veljarane skal merke seg at det finst to typar miljøparti i Bergen. Det finst dei som går inn for lettvinne «løysingar» som sprøyterom. Og så finst Senterpartiet. Vi vil leggje til rette for at folk skal kunne skape seg eit godt liv – ikkje gjere det enklare for folk å halde fram med eit skadeleg misbruk.

ANNONSE

Oppfordring!

Din lokalavis

Følg Nordnesrepublikken